In 2025 het sestien van ons Battle Girlz ’n 12-weke uitdaging aangepak om hul gesondheid doelbewus te verbeter. Die resultate was uitstekend — saam het die dames ’n ongelooflike 60 kg verloor.

Die sukses van hierdie uitdaging word nie net gemeet aan gewigsverlies nie, maar aan die manier waarop die dames mekaar ondersteun het. Hulle skryf die oorwinning toe aan gemeenskap, verantwoordbaarheid, en veral daaraan dat hulle hierdie pad ’n saak van gebed gemaak het.

Aan die begin van elke jaar is daar baie dames wat graag aan hul gesondheid wil werk. Daarom het ons besluit om hierdie groep oop te stel vir alle dames wat saam met ons wil stap om hul gesondheidsdoelwitte te bereik.

By ons gaan dit nie net oor ’n dieet of die nuutste pil nie. Ons werk saam, ons ondersteun mekaar — maar meer as dit, ons bid saam. Ons glo ware gesondheid begin by die hart en word versterk deur geloof, gemeenskap en volgehoue keuses.